2016.02.18 【2.18 串燒 川燒~滋味行TASTY ROAD】

2016.02.18 【2.18 串燒 川燒~滋味行TASTY ROAD】

上到大專，乃至工作，

妳總有機會認識來自五湖四海嘅人，

因緣際會，同妳相識，

喺妳生命中出現，

同妳行一段路，

上一節課，

留下一個烙印後，

就淡出妳嘅生活。

又一個實習生明天LAST DAY，要回去自己嘅大城市，

就以佢家鄉菜，祝佢錦繡前程。

呢餐分5部曲:

1.海上鮮

2.陸上肉

3.蔬菜類

4.甜品類

5.飲品類

1.海上鮮

川香海蜇頭伴青瓜 同 川辣酒煮東風螺

對我嚟講，川辣太勁，

對佢嚟講，家鄉風味，

只能夠講一方水土養一方人，呢個佢專屬獨享。

燒自家製墨魚八爪魚棒

食得出用心將兩者結合，其實我都有諗過喺屋企將墨魚八爪魚混合做魚丸，但通常屋企都鍾意炒菜用，所以一直未嘗試，今日試咗，喜歡呢個味道，我諗我下次買咗會動手做。

燒日本廣島生蠔

燒過之後，明顯細隻咗，但我的確喜歡熟咗嘅蠔，唔會有一股腥味，好味好多。

燒鮮白鱔

鱔肉厚切，所以燒咗都唔會乾身，但居然有骨，有啲失望。

黎生係金句王，作為佢n年前嘅粉絲，創作金句，我都okay㗎。

“ 失望之後有安慰 ”，何出此言?因為我有黃金燒大虎蝦安慰我。

黃金燒大虎蝦

一人一隻，由於佢唔鍾意咸蛋黃，所以佢話麻麻哋

但我個人認為，隻虎蝦夠鮮夠彈牙，為咸蛋黃而扣分就有啲唔公平。

2.陸上肉

燒煙肉荔枝卷

通常自己做小食，都會用煙肉包腸仔，

呢度用煙肉包荔枝，

咸和甜夾雜，

誰也不搶誰的風頭，

兩者好好配合。

燒一口鵝肝多士

鵝肝軟，多士脆，混合成好好嘅口感。

 燒特級牛脷芯 同 燒鮮雞腎

兩者來自唔同嘅動物，但卻有異曲同工之妙，爽口，有嚼勁，正

秘制醬BB燒豬肋骨 同美國牛柳粒

中規中矩，大家對佢嘅期望，就係佢嘅質素。

當然如果豬肋骨，肉多啲，骨細啲，牛柳粒再多啲大啲就更好啦。

3.蔬菜類

食咗咁多肉，當然要用蔬菜平均吓。

吾係紐西蘭大磨菇

上面滿滿黑松露味，一隻大磨菇要當佢係一塊扒，

分兩份，一同分享。

 香草芝士牛油焗西蘭花

用錫紙包成盒仔咁，用刀開，

芝士同牛油香味撲鼻而來，

一口一口，好快就沽清。

 4.甜品類

對於甜品，越有創意，我就越有鍾意。

法式燒綿花糖朱古力厚多士

燒融嘅綿花糖放喺脆身厚多士，

中間夾住一塊香蕉片，

配上朱古力漿，

味道出奇哋夾，

又有特別口感，好玩。

燒芝麻湯圓

我最鍾意芝麻湯圓，呢度居然攞佢嚟燒，

我當然要試試，芝麻湯圓外皮變脆，

裡面依然流動，好鍾意呢創新思想。

5.飲品類

雪梨海底椰同銀菊露

串燒，始終係熱氣同上火之物，

飲番杯清涼嘢係會好啲嘅，

呢度有得叫雪梨海底椰同銀菊露，

梗係要馬上降火啦。

為猴年鴻圖大展

身體健康，

心想事成，

工作順利，

家庭幸福，

愛情美滿。

飲杯，Cheer!