2015.12.13【12.13 "越南"越愛~滋味行TASTY ROAD】

2015.12.13【12.13  "越南"越愛~滋味行TASTY ROAD】

我同GG都唔係好明點解啲人鍾意杯緣子，

剛好THE ONE有用杯緣子做THEME嘅展覽，

讀CULTURAL STUDIES嘅我哋決定一探究竟。

但出得嚟尖咀，一定會先俾海港城吸去。(至少我係，海港城叫我天天進步。)

海港城名店啲嘢貴，暫時我未能出手，

但WINDOW SHOPPING都教一星期日日加班嘅我哋心滿意足。

但腳仔就非常攰，所以都係要去返最初嘅目的地覓食開飯。

因為上次去食泰菜唔錯，諗住返去再食過，

但人龍非常長，又攰又餓，

見隔離越南餐廳有位唔駛等，又唔係一啲人都冇，

我哋互換眼神，二話不說，入去啦。

好明顯仲有俾個法文名同紅黃藍搶眼嘅三主色吸引。

色彩繽紛，裝潢別緻

眼見海鮮酸辣鍋特價，馬上ORDER

愛DESIGN嘅我，喺中學時候都有一本手製COOKBOOK

同呢本MENU COVER好似，不過已經送人，

睇到呢個，回憶無憂無慮的愉快時光。

等食中，自然係我影相好時機。

兩隻碟，絕對有:"橙撞綠刺眼色水　卻有錯體的美"

GAS爐 FOR 海鮮酸辣鍋

海鮮酸辣鍋(滾前)

海鮮酸辣鍋(滾後)

有大頭蝦、墨魚仔、大蜆

有芽菜, 通菜, 蕃茄及菠蘿

愛菠蘿嘅我盛出滿滿一碗獨享。

大蜆好大，呢張相感覺唔到。

放落匙羹，同匙羹一樣大，咁就知有幾大，

知道哂啲料，我下次都可以喺屋企煮。

越式特級牛頸脊湯粉

上枱時俾大家睇到牛頸脊未熟，即表明呢個係越式做法，

芽菜和九層塔我唔食，所以變擺設。

將牛頸脊肉放入熱辣辣的湯浸熟，對唔食生嘢嘅我嚟講，可以接受兼放心食用。

厚身牛頸脊肉，肉質唔錯。

河粉滑身，湯底清甜鮮味。

我仲多一種食法，放咗少少海鮮酸辣鍋嘅湯，

又係另一種風味。

泰式炸蝦餅

因為本身想喺隔離食泰菜，但冇位，

為咗嘴饞，所以喺越南餐廳叫泰小食

炸得夠脆夠香，大愛，心心眼。

香茅豬頸肉

食豬，我至愛豬頸肉，

點煮都好味，喜歡佢又爽又彈嘅口感。

最重要係唔乾身，一口接一口，欲罷不能，

唔點酸甜醬就最好。

鮮蝦米紙卷

米紙卷有一大扎的米粉、生菜同蝦，

食第一件，味道較淡。

我又創新嘗鮮，

加塊豬頸肉，

新菜式又誕生啦。

牛油雞翼

食到嘅煮法:

牛油開鑊，爆香蒜蓉，

再將炸得香口嘅雞中翼回鑊，

又脆又香嘅牛油蒜蓉雞中翼面世

又一次Amélie玩食焦糖燉蛋，

喜歡佢冷與熱相遇的感覺。

香芒糯米飯

第一次試香芒糯米飯，

都係因為我愛芒果，

香芒係甜，

白糯米、紫米同椰漿係咸，

咸中帶甜，

好特別，好有趣。

不過，我都係喜歡芒果豆腐花。

菠蘿梳打

我食咗一碗菠蘿都唔夠喉，

所以叫多杯菠蘿梳打，

原來菠蘿同梳打水分開上，

梳打水冇味，配上新鮮菠蘿，

甜味剛剛好。

越南滴滴咖啡

叫咗兩杯，

咖啡由越式滴滴壺一點點慢慢滴入已有煉奶嘅茶杯

成個過程，都要十分鐘，

玩嘢成分居多，

我加冰變凍啡。

為明天又再加班努力飲杯。