2015.10.16【10.16 對你感激難盡，“特別謝師宴”~滋味行TASTY ROAD】

2015.10.16【10.16 對你感激難盡，“特別謝師宴”~滋味行TASTY ROAD】

 “返學” 返咗一個月，“鍾SIR”成日都教我好多嘢，

又成日明地同暗地裡幫我，小妹非常感激，

所以鼓起勇氣請“鍾SIR”食飯，當作“特別謝師宴”。

“鍾SIR”係個有要求嘅人，

佢就上OPENRICE,選咗呢個餐廳。

到食呢日，入到嚟，“鍾SIR”話呢度私隱度高。

早到有早嘅好處，好NICE嘅STAFF由我哋揀坐邊，

佈置好有氣氛，加上BOLLYWOOD音樂好正，令星期五晚更輕鬆。

話明“謝師宴”，當然要由“鍾SIR”話事，

但佢真係好紳士好細心，首先會問我食唔食羊呀等等，

仲係都要我點番個DISH，

曾經放洋留學嘅佢英文好，由佢同STAFF溝通最好。

佢叫咗羊咖哩同芝士燴菠菜茸，

我鍾意蝦，當然叫印度燒烤蝦。

“鍾SIR”話有菜有肉平衡啦。

食得印度菜多，你會知道胡椒餅要脆先好食，

呢間餐廳做得到，

三款SAUCE，紅色最辣，啡色最好，酸酸甜甜，勁正。

NAAN好出色，

熱辣辣，又軟綿綿。

“鍾SIR”唔想凍咗NAAN，

將我手上NAAN搶去，

係都要一塊NAAN兩份分。

芝士燴菠菜茸都係第一次試，

愛芝士嘅我真心覺得“鍾SIR”點得好，

放上NAAN，好夾。

羊咖哩就真心有啲辣，

如果冇NAAN，真係唔知點算。

印度燒烤蝦上枱，

食咗一啖，知道係甜嘅，

我同“鍾SIR”好似有救星，

開始食蝦唔食羊。

 平日我出街食飯，一定叫檸茶，

但作為一個芒果控，

去印度餐廳，一定叫我最愛嘅芒果LASSI，厚實質感，好香甜嘅芒果味。

 “鍾SIR”呢杯檸檬飲品唔放甜，佢好勁。

有媽媽同BB嚟，BB扭計，我哋就睇到笑。

後來，越來越多人入嚟食飯，

 “鍾SIR”提議走，當我一起身，

佢又一手幫我攞住我個好重嘅袋，

攪到我超唔好意思。

後記:  (“鍾SIR”睇唔到先可以寫)

今晚，“鍾SIR”主動分享咗好多個人嘢，

我冇諗過佢會講嘅嘢，佢都會講，

又觀察入微，講咩都中，超似一個預言家。

佢真係好叻，好有才華，

同佢相處好舒服，

為人設想、細心、體貼，

無私嘅分享，由衷佩服同欣賞佢。

 “鍾SIR”，對你感激難盡，

希望咁攰嘅佢出嚟食呢餐飯，食得開心啦，

知道“蠢學生”真心多謝佢，

不過，其實我應該又唔蠢得哂啩，

感覺到佢為我慳荷包，

但我真係怕佢唔飽。

因為之前佢為我餓過，

我怕餓親人哋個仔，

我唔知點賠番個仔俾人。