美人G又要怕，又想試印度菜。
係都要拉我一齊去，佢話知我呢排成日同港島朋友飯局，多揀印度菜，所以要我呢個有經驗嘅人帶路。
即係咁，我其實唔介意同佢食，但美人又要逼我陪佢食夜晚，又要情調好。
心裡頭大叫：大姐，我之前都係食LUNCH同BRUNCH啫，夜晚？我識咩啫？
不過，好彩世上有OPENRICE,可以睇相揀餐廳。
一早book好枱，邊行邊同佢坦白，呢間我未試過，但完全按佢唯美主義去揀，好味佢請我，唔好味我出三分二(其實無論點都好，呢餐我決定出一半，因為要賀佢升職)
按OPENRICE索引，好快就行到，地下舖，別有洞天，
冇小橋，但有流水，
行入去，裝置非常雅致，
又有吸引我眼睛嘅印度小擺設，
訂枱早到嘅好處係，我哋可以被安排坐靚靚枱，自成一角
帶埋印度小明嚟
同朋友食得多，深明如何為初嚐印度菜嘅朋友揀嘢食
有康乃馨喺枱，又有玻璃杯作燭臺，擺放蠟燭，溫馨氣氛升級
小明等我哋叫嘢食
二話不說，先嚟兩杯芒果LASSI
美人G第一啖之後嘅評語：好飲，果然冇介紹錯
有人喺OPENRICE話呢間餐廳枱上樽裝水要收費，我哋當然唔掂佢。不過當我哋打開MENU,都有見佢提醒客人，呢個改進，值得一讚
前菜之嘛，小明又八一餐
話明賀升職，就係開心啦，開心自然就要笑哈哈，哈哈就蝦蝦
所以兩個DISHES都係蝦
串燒大蝦
唔用手榨檸檬汁，再淋上去啲蝦度
唔駛喺路邊熱辣辣咁食，一流
香濃茄汁燴蝦球
甜甜茄汁同蝦球好夾
用印度烤餅點住食，好正，一滴不漏
尼泊爾式燒雞翼
用嘅係雞全翼，
所謂燒雞翼，我鍾意食
尤其唔駛自己燒
雞皮脆，雞肉嫩
美人G係一個雪糕迷，見到有印度雪糕，佢就叫，
個雪糕好厚實，食落有果仁碎，我估計係果仁碎同雪糕混合再雪硬，如果係果仁控，應該好啱食。
新職位，新挑戰，恭喜恭喜!
沒有留言:
張貼留言